Uma Media Rejional Baucau Ofisialmente loke

Atu publika imediatamente 19 Agostu 2009

Baucau, Timor-Leste –Uma Media Rejional Baucau ofisialmente inagura ohin, tinan ida resin hafoin uma media ne’e hahu serbi media sira iha distritu leste nian Lautem, Viqueque, no Baucau, hahu 2008.

Uma media fo benefisiu barak ona ba jornalista Timor oan sira, liu-liu reporter sira iha distritu, ne’ebe iha tempo pasadu tenke ba to’o Dili atu asesu rekursu sira ne’ebe mak agora disponivel ona iha uma media.

Jornalista sira bele asesu internet gratuita no bele empresta sasan sira hanesan gravador no kamera dijital no mos sasan eskritoriu sira seluk.

Importante liu tan liu husi uma media ne’e mak jornalista sira bele asesu ba formasaun jornalizmu sira ne’ebe halao bebeik no mos formasaun sira iha area jestaun, finansa, no publisidade ne’ebe halao husi treinador ICFJ sira.

Objetivu prinsipal ida tan husi uma media mak atu hasa’e sasulik informasaun iha rejiaun laran. Manuel Ximenes, koordenador uma media servisu hamutuk ho administrador distritu no autoriedade lokal sira no mos diresaun UN nian iha baze no diresaun ba informasaun publiku atu bele kria meio foun no inovativu sira atu disemina informasaun no atu komplementa mos servisu estasaun radio komunidade nian.

Uma media Baucau agora dadaun iha fatin operasaun rua, ida mak iha Baucau Buka Hatene ne’ebe VSAT no server tau ba, no ida seluk tan iha fatin servisu Timor Post nian.

Uma media Baucau hahu funsiona iha Janeiru 2008. Uma media sira seluk ne’ebe mos halao operasaun ona mak hanesan iha Dili, Ermera, Suai no Oe-cusse. Uma media Oe-cusse sei loke ofisialmente iha 4 Setembru. Uma media Suai sei iha abertura ofisial ida ne’ebe sei akontese iha meio fulan Outubro nian. Uma media iha futuru potensialmente inklui Maubisse (distritu Ainaro), no iha Balibo (distritu Bobonaro).

Uma media Baucau ne’e mai husi inisiativa konjunta husi Asosiasaun Jornalista Timor Leste (AJTL), Sindikatu Jornalista Timor Leste (SJTL), Centru Jornalista Investigativu Timor Leste (CJITL), the Timor-Leste Photographers Association (TiLPA), Asosiasaun Radio Komuidade Timor Leste (ARKTL), no International Center For Journalists (ICFJ), no hanesan sentru segundu husi grupu lima ne’ebe estabelese dadaun iha Dili, Baucau, Ermera, Suai, no Oe-Cusse.

Estabelesimentu rede Uma Media Rejional sira iha nasaun ne’e projeitu ida ne’ebe posivel liu husi projeitu ba tinan lima nian ho valor orsamentu tokon US$ 5.6 ba programa “Strengthening Independent Media Program” ka programa hametin media independente ne’ebe hetan suporta konjunta husi USAID no AusAID.