Dili 2 Jullu, 2009 – Reprezentante Espesiál Sekretáriu-Jerál Nasoins Unidas nian (RESJ) ba Timor-Leste Atul Khare ohin hasoru malu iha Sede ONU iha Dili ho delegasaun ho membru balu husi Komisaun Asisténsia ba Demokrasia nian husi Kámara Reprezentante sira-nian husi Estadus Unidus ne’ebé Prezidente Komisaun, Rep. David Price (Demokrata-Karolina Norte), maka lidera. Membru seluseluk iha delegasaun Kongresu amerikanu nian maka Rep. Jim McDermott (Demokrata-Washington), Rep. Jim Cooper (Demokrata-Tennessee), Rep. Bob Etheridge (Demokrata-Karolina Norte), Rep. Vern Buchanan (Republikanu-Florida) no Rep. Phil Gingery (Republikanu –Jeórjia).

Iha vizita ba dala uluk husi delegasaun ofisiál ida husi Kongresu EUA mai Timor-Leste, RESJ Khare hato’o informasaun detallada ba kongresista sira kona-ba mandatu no atividade sira Misaun ONU nian, hanesan mós kona-ba Timor-Leste nia progresu iha diresaun ba estabilidade sustentavel liutiha krize 2006 nian. Nia subliña importánsia husi asisténsia Estadus Unidus nian ne’ebé fornese liuhosi USAID ne’ebé, nia hatutan, nu’udar kontribuisaun boboot ida ba dame, estabilidade no dezenvolvimentu ekonómiku iha nasaun nurak ne’e.

“Signifikativu katak EUA, ne’ebé entre demokrasia antigu liu no importante liu iha mundu rai-klaran, harii daudaun relasaun metin ho Timor-Leste, ne’ebé entre demokrasia nurak liu iha mundu rai-klaran,” RESJ Khare dehan. “Relasaun ida-ne’e,” Khare hateten, “bele ajuda hakle’an komprensaun katak demokrasia iha nasaun nurak hanesan Timor-Leste fornese dalan di’ak liu hotu atu hadi’ak problema sosiál sira, no nune’e hamosu kondisaun sira ba seguransa no dezenvolvimentu ba tempu naruk ne’ebé di’ak liu.”

RESJ Khare hato’o obrigadu ba Prezidente no membru sira Komisaun nian tanba sira-nia tulun maka’as ba Timor-Leste, no mós ba misaun tuituir malu ONU nian iha Timor-Leste. Nia mós nota importánsia katak delegasaun EUA nian ne’e grupu pluri-partidáriu, no faktu katak ho enkorajamentu husi ONU delegasaun parlamentár sira husi Timor-Leste ba nasaun seluseluk mós tuir modelu pluri-partidáriu.

“Apoiu husi Komisaun Asisténsia ba Demokrasia nian husi Kámara Reprezentante EUA ba Parlamentu Nasionál Timor-Leste nian hodi estabelese ninia biblioteka parlamentár ne’e ezemplu di’ak ida husi asisténsia hodi harii instituisaun demokrátika sira nasaun ne’e nian,” nia hatutan.

RESJ Atul Khare uluk hasoru malu ho prezidente Komisaun ne’e nian durante ninia viajen foin daudaun ba Washington, iha Fevereiru tinan ne’e nian, no iha momentu ne’ebá sira ko’alia kona-ba posibilidade atu hala’o vizita ofisiál ba dala uluk ne’e husi Membru Kongresu EUA sira mai Timor-Leste.

Iha Sábadu, 4 Juñu 2009, delegasaun husi Kongresu sei viaja ho elikópteru ONU nian to’o zona sentrál foho iha Maubisi, ne’ebé sira sei vizita kooperativa kafé nian ida ne’ebé