DILI – Situasaun jeral atividade votasaun ba lideransa komunitaria iha capital Dili lao normal. Iha sentru votasaun ida-idak, Polisia Nasional Timor Leste koloka membru sira hodi fo seguransa. Kuaze iha sentru votasaun sira balu populasaun iha entuziasmu hamriik forma ona dadeer tuku 06.30.
Hanesan iha suku Komoro, Fatuhada, Kampung Alor, Vilaverde nebe jornalista ekipa kobertura konjunta informa, katak votasaun la’o seguru, ka laiha peturbasaun durante votasaun.
Iha sentru votasaun EP No.5 Kampung Baru, suku Komoro nian, jornalista Juliao Fernandes informa katak iha tuku hitu dader sentru votasaun loke ona no populasaun balu forma hein atu vota. Iha sentru votasaun EP No.9 Aimutin to’o tuku 10.00 votaten sira sei forma naruk atu vota. Iha sentru votasaun EPS 30 de Agostu no EP Bebonuk to’o tuku 12.00 votante sei forma naruk kuaze 200 ba leten hein ba vota.
Iha suku Kampung Alor, iha sentru votasaun sede suku nian, jornalista Tomas Rodrigues fo reportajen katak votante sira mai hein ka forma ona atu vota molok tama tuku 07.00 oras vota nian. Maizumenus ema nain 50 nune’e forma ona hodi heis oras hahu votasaun.
Iha suku Fatuhada, jornalista Adalberto Elo fo reportajen katak iha sentru votasaun iha EPS No 2 Komoro hahu loke iha tuku 07.00 loloos. Iha pakote lima mak kompete iha suku Fatuhada ho nia xefe suku Armando Goncalves, Justino Moniz de Leite, Mario Ataide, Marcelino Soares, no Mateus Ximenes.
Iha maizumenus tuku 08.00, Diretor STAE Tomas Cabral vizita sentru votasaun EP no.5 Kampung Baru, suku Komoro. Nia informa situasaun jeral iha teritoriu tomak katak to’o tuku 08.00 dader ne’e situasaun lao normal. Iha Distritu Vikeke mak tuir Tomas Cabral, material eleisaun to’o tarde iha suku balu.
Iha suku Komoro iha pakote lima ho nia kandidatu xefe suku mak Antonio da Costa Xavier, Eurico da Costa de Jesus (xefe suku atual), Juliao Soares da Silva, Lino Pereira da Cruz, no Mateus Francisco Tavares.
Xefe suku atual suku Komoro Eurico da Costa de Jesus nebe sei kandidata an ba eleisaun suku ne’e temi katak eleitor iha suku ne’e rejistradu 21.887.
Nia hatete se povu hili nafatin, nia prontu halao programa nebe tinan haat liuba hala’o ona. Tuir nia katak problema nebe seidauk resolve mak veteran sira nian, deslokadu sira.
Maibe se la pasa iha eleisaun ne’e, nia pronto mos at suporta nafatin ba pakote seluk nebe manan.
Iha suku Kampung Alor pakote tolu mak komptete iha suku ne’e ho nia kandidatu xefe suku Agustinho G. da Silva nudar xefe suku atual, Afonso Soares, no Olimpio M. Cristo.
Iha suku Vila Verde iha pakote kandidatu tolu ho nia kandidatu be xefe suku mak Artur Arranhado, Antonio de Jesus Nunes, no Francisco Bento. Kandidatu xefe suku nain tolu ne’e ba jornalista hatete katak sira iha komitmentu ida deit katak lakon mos sira simu no manan karik sira sei hakuak povu tomak iha suku ne’e nia laran.
Situasaun iha sentru votasaun la’o normal, polisia sira mos la’o liu deit hodi haree situasaun. Iha mos observador husi OIPAS no IRI nebe prezensa iha sentru votasaun hodi observa diretamente prosesu votasaun.(*)