Jornalista Radio Komunidade Iliwai Alzira Ximenes
husi Manatuto fó reportajen katak iha Sentru votasaun Suku Aitea Distritu Manatuto eleisaun ba lider komuintariu hala’o iha tuku 08 : 08:00 Otl, tamba razaun fiskalizador no observadores to’o iha sentru votasaun tarde liu.
Ho situasaun ne’ebé akontese ne’e, votantes halo protesta hasoru brigada sira. Maibé la rezulta aksaun ruma iha sentru votasaun.
Durante prosesu eleisaun ne’e la’o durante horas balun, kuaze iha tuku 10:00 liu votante sira hadau malu fatin no dudu malu tama to’o iha liña forma nian maibé seguransa la halo atuasaun tamba polisia ida deit mak halo seguransa no laiha apoiu seguransa husi UNPOL.
Suku Aitea distansia ± 200 m, husi Kapital Distritu Manatuto. Iha suku Aitea iha pakote rua, mesak mane hotu deit.
Iha parte sorin Jornalista Radio Komunidade Povu Viqueque Angelina Alves informa katak, iha Suku Carau Balu iha sentru votasaun rua (A no B) ne’ebé lokaliza iha eskola Cabira-Oan suku Caraubalu, Subdistritu Viqueque Distritu Viqueque, loke iha tuku 07:00 Otl.
Komunidade iha suku ne’ebá antusiaismu maka’as hodi partisipa iha festa demokrasia ida ne’e.
Eleisaun lider komunitariu iha sentru votasaun ne’e la’o ho diak no hetan seguransa husi PNTL no UNPOL.
Maibé iha suku Waitame, Sub distritu Watucarbau mosu problema iha sentru votasaun tamba pakote rua iha konfuzaun ba sira nian lista pakote, tamba pakote primeiru nia naran mosu fali iha pakote segundu no pakote segundu nia naran mosu fali iha pakote primeiru.
Tamba ne’e kandidatu sira halo protesta no atu empata tiha votasaun. Maibé ikus mai Komandante Polisia Distritu Viqueque rasik tun ba iha sentru votasaun hodi atua situasaun no loke votasaun hodi nune’e situasaun lao normal fali.
Husi sorin seluk Reportajen Jornalista Faustino Guterres husi Sentru Votasaun SDN I Filial SDK Suku Bahú informa katak, eleisaun iha sentru votasaun ne’e hala’o iha tuku 07:00 Otl tuir horariu ne’ebé estabelesidu.
Iha sentru votasaun ne’e iha votantes ema kuaze rihun rua mak la tuir votasaun tamba problema dokumentus, balun laiha kartaun eleitoral, balun kartaun eleitoral tuan no seidauk troka, balun kartaun eleitoral husi Suku seluk maibé hakarak atu fó sira nian iha votu iha Suku Bahú. Tamba ne’e obrigadu brigada sira kansela no latuir votasaun.
Alende ne’e, iha votantes balun mós halo protesta hasoru brigada sira nian servisu ne’ebé atraza liu ou neneik liu cek lista votantes nune’e votantes tenke dudu malu tama to’o iha meja brigada nian.