Situasaun seguransa jeral ba loron eleisaun suco iha distritu Likisa, liliu suco Dato, Suco Bairopite no Bidau Santa-ana lao kontrolado tanba hetan seguransa husi Polisia Nasional Timor Leste (PNTL) nomos Polisia Nasoens Unidas nian (UNPOL).
Tuir reportajem jornalista sira ne’ebe envolve iha kobertura konjunta haktuir katak, hahu tuku 06.00 centro votasaun Eskola Primaria numeru 4 suco Bairopite no centro votasaun suco Dato, distritu Likisa no Suco Bidau Santa-ana laiha problema sobre preparasaun ba ekipamentus.
Problema ne’ebe akontese iha suco Dato mak brigade sira haluhan savi sela bainhira atu prepara material sensitivu maibe konsege resolve.
Votantes husi suco Dato estasaun 3 centru votasaun Eskola Primaria Mauboke Miguel dos Santos, 18 hateten, eleisaun suco importante ba nian tanba bele resolve problema saida deit iha suco laran.
Tanba importante, nia husu ba populasaun ne’ebe la-tuir eleisaun, ba futuru bele partisipa.
Maioria populasaun iha Suco Bidau Santa-ana, Bairopite no Dato distritu Likisa antusiasmo tuir votasaun hodi hili sira nian lideransa suco.
Iha Suco Bairopite, centru votasaun Perumnas votantes ida bainhira remata vota la tau kartaun buletin de votus iha kaixa maibe soe besik area votasaun. Hahalok ne’e brigada sira la-konsege identifika.
Numeru votantes ne’ebe tuir eleisaun iha centru votasaun Eskola Primaria Bairopite hamutuk ema nain 1500, no total votantes iha centru votasaun Sede Suco Dato hamutuk ema nain 1651. (*)