Material Sensitivu Hatama Tarde Iha Sede Suku
Iha sentru votasaun Samaguia Suku Tequinomata material sensitivu hatama iha fatin seguru ka hatama sede Suku iha tuku 19:00 Otl, tamba odamatan sede suku nian xafe metin. I xafe sede suku nian iha Xefi Suku nia liman no lori sai tiha.
Material sensitivu to’o iha sentru votasaun iha tuku 14:00 Otl, kontinua hetan seguransa máximu husi PNTL no UNPOL inklui brigada sira.
Ho prosesu hatama tarde iha sala sede suku nian tamba ne’e brigaditas hamutuk parte seguransa tenke hein kuaze horas Neen nia laran.
Ajente Polisia Sub Distritu Laga, Inspektur Tomas Ximenes ne’ebé mak simu kna’ar hala’o seguransa iha sentru votasaun ne’e informa ba Jornal Nacional Diário hateten katak, situasaun ida ne’e akontese tamba falla STAE nian tamba la fó informasaun antes ba Xefi Suku Tequinomata konaba material sensitive ne’ebé tenke to’o iha sentru votasaun, sede suku Tequinomata iha tuku 14:00 ou liu husi oras ne’e.
Tamba ne’e Tomas Ximenes hatutan Xefi Suku la preparadu no sai tiha ba partisipa iha programa seluk.
“Tuir Xefi nia informasaun mai ami katak, husi STAE mak fó informasaun ba nia katak material sensitivu sira ne’e tenke to’o iha sentru votasaun iha sede Suku Tequinomata iha tuku 14:00 Otl, loraik, ne’ebé ha’u fallansu ne’e la’os husi Xefi Suku mas husi STAE”,dehan Tomas Ximenes.
Tuir Tomas Ximenes, maske material sira hatama tarde maibé la iha akontesimentu ruma ba material sensitivu sira ne’e.
