Falta Informasaun, Votante Balu La Hetan Autorizasaun Vota
DILI – Fallansu balu mosu iha loron votasaun eleisaun lideransa komunitaria 9 Outubru iha capital Dili nebe votante sira balu halo tanba falta informasaun.
Iha sentru votasaun EP No.5 Manleuana, Xefe Aldeia Manleuana Leonito Guterres informa katak partisipasaun eleitor sira iha aldeia ne’e minimu tebes tanba falta informasaun husi STAE kona-ba eleisaun ne’e.
Iha suku Vila Verde, sentru votasaun EP No. 9, tuir reportajen jornalista Francisco Luis, mosu votante ho kartaun eleitoral suku Kolmera nian hakarak tuir votasaun iha Vila Verde ne’e tanba hanoin katak eleisaun lideransa komunitaria ne’e hanesan deit ho eleisaun jeral parlamentar no presidensial. Ida ne’e akontese mos iha sentru votasaun ES Finantil, Aimutin, Komoro. Eleitor husi suku seluk hakarak vota maibe rejeita husi polling staf sira. Sira nebe ho kartaun eleitoral suku seluk ne’e la konsege vota hafoin hetan rejeita no esplikasaun husi brigade STAE sira iha sentru votasaun refere.
Iha sentru votasaun refere mos mosu votante ho kartaun eleitoral tuan nebe brigade sira la autoriza tuir vota. Kazu hanesan akontese iha suku Kampung Alor nebe iha votante nain haat, feto rua mane rua la hetan autorizasaun tanba kartaun eleitoral tuan. Balu fali laiha naran iha lista eleitor maibe bele vota tanba iha kartaun eleitoral foun. Iha mos eleitor ida mak lori deit fotokopia kartaun eleitoral no la hetan autorizasaun vota.
Iha votante ida iha sentru votasaun Vila Verde ne’e uza deit lapizera mak marka kartaun votu maski iha ona pregu atu tuu. Hafoin sai tiha mai liur, votante ne’e fila fali ba hatete brigada sira katak nia la tuu kartaun votu maibe fo vistu deit no husu atu vota fali maibe la konsege tanba la hatan husi polling staf sira.
Nune’e mos iha sentru votasaun Manumeta Raihun suku Vila Verde, populasaun nebe iha direitu vota labele tuir votasaun tanba laiha kartaun eleitoral. Lideransa komunitaria iha fatin ne’e informa ba jornalista katak populasaun sira barak mak foin mai husi foho no laiha kartaun eleitotal.(*)
