GLENO – Eleisaun lideransa komunitaria nebe hala’o iha 9 Outubru ne’e hamosu impresaun katak votante sira falta informasaun oinsa atu preve nia direitu vota. Eleitor balu “tama sala” suku seluk no lakon direitu vota.
Hanesan akontese iha suku Riheu no Fatukeru sub distritu Ermera Vila. Iha suku Riheu, tuir reportajen jornalista ekipa kobertura konjunta katak iha votante ida husi suku ida iha distritu Lautem nian no mos Augosto Martins husi Suku Aufu (Letefoho), Adriano Soares no Monica Lemos husi Suku Estado, Francisco de Araujo husi Suku Lauala no ida seluk husi Bairo Pite, Dili la hetan autorizasaun vota tanba la’os partense ba suku Riheu nian. Nune’e mos iha suku Fatukeru, eleitor nain rua husi Suku Poetete, Talimoro nain ida, Ponilala nain ida no Fatubesi ida labele vota. Nain ida identifika iha suku Talimoro nebe labele vota.
Situasaun jeral durante votasaun iha suku hirak ne’e la’o normal laiha perturbasaun no hetan seguransa husi elementu Polisia Nasional Timor Leste (PNTL)
Iha Suku Talimoro, eleisaun halao iha sede suku ho total eleitor hamutuk 1341. Iha suku ne’e monta sentru votasaun ida no estasaun votu nian rua. Estasaun A iha eleitor 489 no estasaun B iha eleitor 852. Poling staf iha 10 no brigada 2. Estasaun A iha poling staf 5 no brigade 1. Estasaun B iha poling staf 5 no brigade 1.
Kandidatu ba Xefe Suku Talimoro iha pakote tolu maka Felisberta de Jesus, Luis dos Santos no Martinho Soares Martins.
Iha Suku Riheu, Gleno eleisaun halao iha sede suku ho total eleitor hamutuk 1309. Sentru votasaun iha ida no estasaun votu iha 2. Estasaun A iha 659 no estasaun B iha eleitor 650. Iha suku ne’e prezensa observador nain 2 husi OIPAS Dioseze Dili.
Kandidatu ba Xefe Suku iha pakote tolu. Kandidatu sira nee maka Arcanjo Maia, Domingos dos Santos no Ildefonso das Neves P. Soares. Laiha fiskais husi kandidatu sira.
Iha suku Lauala, eleisaun halao iha Kolejiu LAR DO BOM SAMARITANO ho total eleitor hamutuk 1098 no estasaun votu nian ida. Iha suku ne’e mos prezensa observador nain 3 husi OIPAS Dioseze Dili.
Kandidatu ba Xefe Suku Lauala iha pakote 3. Kandidatu sira nee maka Bendito de Araujo Soares Martins, Cipriano Salsinha no José Xavier Amaral. Populasaun sira antusiazmu tuir eleisaun maske loron manas. Sira ba vota ho forma nebe rapidu tebes.
Iha perturbasaun ki’ik akontese iha suku Lauala ne’e tanba iha populasaun balun maka hafuhu fali nia maluk sira ba vota iha fatin segredu tamba fatin votu nee besik iha janela. Maibe, la kleur deit poling staf sira haruka ema hirak nee husi janela.
Iha suku Fatukeru, Subdistritu Railaco eleisaun halao iha eskola Primaria Fatuquero ho total eleitor hamutuk 781 no estasaun de votu ida. Populasaun sira antusiazmu tuir eleisaun maske loron manas. Sira ba vota ho forma nebe rapidu tebes.
-Eleisaun iha suku refere remata sedu tamba eleitor ladun barak. Eleisaun nee remata iha tuku 12:15. Maske nunee, poling staf sira hein too tuku 15:00 maka halao kontazen de votu tamba bazeia ba orariu.(Ekipa Kobertura Konjunta)